жаппай қырып-жоятын қарудан қорғану

(Защита от оружия массового поражения)

әскерлерді, тылдағы объектілерді ядролық, химиялық, биологиялық қарулардың зақымдауынан қорғау, әскерлердің соғысқа қабілеттілігін сақтау мақсатында жүргізілетін шаралар жиынтығы. Ол үшін төнген қауіп туралы дер кезінде хабарлау, халықтың кейбір бөлігін қауіпсіз жерге көшіру, қорғанатын баспана ұйымдастыру, қорғанудың дербес құралдарымен, сумен, азық-түлікпен қамтамасыз ету, халықтың азаматтық қорғаныс жөніндегі білімін арттыру және халықтың үрей-ленбеуі үшін арнаулы тәртіп сақтайтын қызмет орнын құру шаралары жүргізіледі. Белгілі бір ауданда жарылған ядролық бомба желдің бағытына қарай көптеген аймаққа радиоактивтік зақым келтіретінін есепке ала отырып, әуеден төнген қауіп-қатермен бірге, қарсыластың ядролық соққысы қай ауданда болғаны, желдің бағыты, атом қаруының радиоактивтік зақым келтіретін аймағының көлемі радио арқылы халыққа хабарланады.